ഒരു വാക്കു 

ആത്മീകാന്ധതയാകുന്ന അത്യന്ത താമസിൽപെട്ടുഴലും ലോകത്തിനു, "ഞാൻ തന്നെ വഴിയും സത്യവും ജീവനുമാകുന്നു" ''ലോകത്തിന്റെ പ്രകാശം ഞാനാകുന്നു'' എന്ന് തിരുവായ് മൊഴിഞ്ഞാശ്വസിപ്പിച്ച ലോകഗുരുവായ ശ്രീ. യേശുദേവന്റെ നിയോഗപ്രകാരം, ''സാമുവലിന്റെ സുവിശേഷം രണ്ടാം ഭാഗം" ലോക മനസാക്ഷിക്ക് മുൻപിൽ സവിനയം സമർപ്പിക്കുവാൻ എന്നെ യോഗ്യനാക്കിയ പ്രപഞ്ച ചൈതന്യത്തെ വണങ്ങിക്കൊണ്ട് , ഈ കുറിമാനം ഞാനിതാ സമർപ്പിക്കുന്നു!

''ക്രിസ്തീയത'' യെന്ന ജീവനസിദ്ധാന്തത്തെ ''ക്രിസ്തുമത'' മെന്ന പേരിൽ ലോകമാകെ തങ്ങളുടെ ഉപജീവനത്തിനായി പ്രചരിപ്പിച്ചു , അനന്യമായ ദൈവത്തെ നമുക്ക് അന്യനാക്കിത്തന്ന അന്യായക്കാരായ പൗരോഹിത്യ പാസ്റ്റർ വർഗ്ഗത്തോടുള്ള ഒറ്റയാൾ സമരായുധമായ എന്റെ തൂലിക, കാലത്തിനു നിവേദിച്ച എന്റെ മനസിന്റെ വിങ്ങലുകളാണീ രചന! 

''എന്റെ ആലയത്തെക്കുറിച്ചുള്ള എരിവ് എന്നെ തിന്നു കളഞ്ഞു'' എന്നരുളിയവൻ, എന്റെ ആത്മാവിന്റെ കാതിലൂടെ  ഓതിത്തന്ന കാലത്തിന്റെ പുതിയ സുവിശേഷമാണീ രചന! ദൈവത്തിന്റെ ആലയങ്ങളാകുന്ന മനുഷ്യമനസ്സുകളെ തലമുറകളായി കള്ളന്മാരുടെ ഗുഹകളാക്കിയവരെക്കുറിച്ചുള്ള എരിവാണീ രചന!'

ആഗോള ക്രിസ്തീയതയ്ക്കു അപമാനമായി മാറിയ ആഭാസ പാസ്റ്റർ, പൗരോഹിത്യം, ''എരിതീയിൽ എണ്ണയൊഴിക്കുമാറ്‌ '' അനുദിനം ചെയ്തുകൂട്ടുന്ന കൊടും ക്രൂരതകൾ, അവരുടെ അതിനീച കർമ്മങ്ങൾ സാക്ഷിയായി ഞാനീ രചന വായനക്കാരുടെ [നീചപൗരോഹിത്യം അടിമകളും  ഇരകളുമാക്കിയ ഇരുകാലിയാടുകളുടെ] ഇടനെഞ്ചിലെ ഇരുളകറ്റാനായി സമർപ്പിക്കുന്നു! 

2016 നവമ്പർ ഏഴാം തീയതി പ്രസിദ്ധീകരിച്ച ''സാമുവലിന്റെ  സുവിശേഷം ഒന്നാം ഭാഗത്തിന്റെ'' തുടർവായനയ്‌ക്കായി മനസുകളെ മനക്കണ്ണു തുറക്കുവീൻ... ''തമസോമാ ജ്യോതിർഗമായാ''!  

പോംവഴി ഒന്നേയുള്ളൂ , ''നിങ്ങൾ കപടഭക്തിക്കാരെപ്പോലെ പ്രാർത്ഥിക്കാൻ പള്ളികളിൽ പോകരുതേ''  എന്ന വി.മത്തായി ആറിന്റെയഞ്ചിലെ ക്രിസ്തുവിന്റെ തിരുവചനം അനുസരിക്കുക !  
                                                                                                 സാമുവേൽകൂടൽ

''സമാസംഗീതം ''/ ''അപ്രിയ യാഗങ്ങൾ'' / ''സാമുവലിന്റെ സുവിശേഷം'' [രണ്ടാം ഭാഗം] പുസ്തകങ്ങളുടെ കോപ്പികൾക്കായി ബന്ധപ്പെടുക ,
സാമുവേൽകൂടൽ. 9447333494